Tungag Genesis Translation

Asisinong

IAino luai God kata asinong
na mete kuku na kuli rina.
2 Katapo kovek luai ta M e kuli
rina. Keve bil aongos kitapo
kovek i pukun. Vong lava katapo
pakut a keve bil aongos.
Malanganto i God katapo ngoi
angpok palau e kuli laman.

3 Au na God kala antok,
"Malangas, ku tu aserei." Na kala
malangas. 4 Na God kala arai ta
malangas vola roron na kala
posong angtaliungai ani mala-
ngas pelek a vong. 5 Na God kala
atuk a malangas ang ta tenei ias,
na kala atuk a vong ang ta tenei
vong. Au, vong kala serei le na
kala tenei vauk pok. Asukang na
ainoai i taun kala pasal suai.

6-7 Au na God kala antok,
"Laman, ku tapagal ane si pongua
na palpal. Mang palpal ane
pangkul na mang palpal ane
kevkev. Nei liuan i ngono palpal
ke, ka atogon ta pangau si pagal
ani ngono laman ke." Au na kala
asukang. 8 Na God kala atuk a
pangau ang ta metekuku. Au,
vong kala serei le na kala tenei
vauk pok. Asukang na vapongua
i taun kala pasal suai.

9 Au, na God kala antok,
"Laman ang e kevkev i mete
kuku, ku ago kuvul si sikei a
oring na numai kuli roe, ku tu
aserei." Na kala asukang. lONa
God kala atuk a laman po ago
kuvul ang ta nei laman, na kala
atuk a ring kolo ang ta kuli roe.
God kala arai ania ta vola roron.

11 Na God kala antok, "Kuli roe,
ku apolokai ani mamain ta sukal
atogon katui na mamain ta ei
atogon uai na katui neiria ani ki
uai asereai ani manik iria
akorong ta matan uai." Na kala
asukang. 12 Ri sukal angpetpe-
tekai na ri ei angpetpetekai kila
polok kuli roe. Kita uai asereai
akorong ani kari keve mamain ta
uai. Keve katui iria kita apolokai
akorong pok ani keve tukulai iria.
Na God kala arai ania ta vola
roron. i3Au, vong kala serei le
na kala tenei vauk pok. Asukang
na vapotol i taun kala pasal suai.
14 Au na God kala antok,
"Keve malangas, mi tu aserei e
metekuku ani mi akalit ta
angpetpetekai i tenei ias ve tenei
vong. Keve malangas ke kapa ki
akanangai ani angpetpetekai i
keve taun na keve ulen na keve
matas. is Ani keve malangas ke
e metekuku ki mang amalangasai
ani kuli rina aongos." Na kala
asukang. i6God kata asinong a
pongua na malangas lava. Ri
makarap ve ulen. Makarap vo
tavirimok ang, ani nia ka saupai
ani tenei ias, na ulen ani ka
saupai ani tenei vong. Kata
asinong kapa ri kalto. 17 God kata
asinong a keve malangas ang asi
mang ani kuli rina, 18 ani ki
saupai ani tenei ias na tenei vong,
na ki pagal apetekai ani malangas
na vong. Na God kala arai ania
ta vola roron. i9Au, vong kala
serei le na kala tenei vauk pok.
Asukang na vapuat i taun kala
pasal suai.

1:20

20 Au na God kala antok, "Nei
laman ka duk ta mamain ta
manmanik to. Na ri mani, mi ngoi
angpok neite kuku e pangkul i
kuli roe." 21 Asukang na God kala
asinong ri ielava kuvul ve
mamain ta manmanik aongos
kipo to na kipo duk na kipo sang
angpok nei laman val kari keve
laulauan angpetpetekai. Na ani ri
mani vap po ngoi korong ang,
asukang palau val kari keve
laulauan angpetpetekai. Na God
kala arai ania ta vola roron.
22 Na God kala poso atauia iria
ta mengen asukang ke, "Mi apitus
na mi serei aduk si kami tataot
ani nei laman ka duk tatami. Ri
mani, mi kun apolokai pok animi
ani mi duk si kuli rina ke." 23 Au,
vong kala serei le na kala tenei
vauk pok. Asukang na va
palpalima i taun kala pasal suai.

24 Au na God kala antok, "Ri
manmanik anglok i kuli roe, mi
serei aduk e kuli rina, na mi
apitus asereai pok animi si kami
keve kuvkuvulan angpetpetekai.
Ri vongo asi aiveven, ri man-
manik palis e kuli roe na ri kei i
nei uten, mi apitus angkokoai
singimi pok." Na kala asukang.

25 God kata asinong a ri kei, ri
vongo asi aiveven e rina na ri
manmanik po palis e kuli roe.
Kata asereai aniria ani ki apolokai
pok aniria akorong. Na God kala
arai ta vola roron.

26 Au na God kala antok, "Tara
asinong a ri vap si lilinau na
kankanuai ira. Tara alis iria ta
kitmat si saupai aongos ani
mamain ta ien i nei laman na
mamain ta mani i nei pangau. Ki
saupai kapa ani mamain ta vongo
ipo aiveven na ani kuli rina

2:12

aongos ke na ki saupai kapa ani
mamain ta manmanik kipo palis
na pasal anglok kuli rina." 27
Asukang vanang na God kata
asinong ri vap si kankanuai ina
akorong pok. lo, si kankanuai ina
pok God kata asinong ri vap. Kata
asinong ri vap ani ki tauan na
aina. 28 Na God kala poso atauia
iria ta mengen asukang ke, **Mi
apolokai pok animi. Kami inatus
ki duk e kuli rina na ki saupai
ania. Mi saupai aongos ani ri ien
nei laman na ri mani nei pangau
na ri manmanik aongos kipo ago
kuli roe."

29 Na God kala antok, "Nalapo
alis vang imi ta ri sukal aongos i
kuli rina vopo atogon katui kuvul
ve ri ei aongos vopo uai ang.
Kilapo kakami ani mi angan
singiria. 30 Na ani ri mani i nei
pangau na ri manmanik aongos
kipo to kuli vunep, riria kapa ki
angan pan na uai i mamain ta ei
na uriuri aongos." Na kala asu-
kang. 31 God kala arai ani keve
bil aongos i kana la asinong ang,
na vola roron luai. Au, vong kala
serei le na kala tenei vauk pok.
Asukang na va limalesikei i taun
kala pasal suai.

2Au na God kala akamusai
ani asisinong ani meteku-
ku na kuli rina tavirimok asip ke.
2 Kata akamusai aongos ani kana
keve avibisan i asisinong si va
limalesikei i taun. Au na si va
limalengua i taun kala ausai
pelek kana abis. 3 Kata poso
atauia na taun ang na kala vil
agogoai ania. Kata abis ia

asukang using si taun ang
akorong kata ausai pelek kana
avibisan aongos i asisinong.

God Kata Asinong Ri Vap

4 Kana na akuskus i sa kata
serei si taun ang na God kata
asinong na mete kuku na kuli
rina. Si taun ang a God, nang nia
na lAVE, kata asinong a kuli rina
na mete kuku, skatapo kovek i
mangsikei a bil i suk polok le kuli
vunep, using lAVE parik katapa
alis langit lak kuli rina na katapo
kovek lak i igenen si itoitonai ani
nei roe. 6 sikei laman katapo uli
uv alak le nei roe na kapo vil
avuluk na kuli roe aongos. 7Na
lAVE kala kap roe le kuli vunep
na kala pitopito na igenen tatana.
Le na kala kui alak kana malu i
to ane si isuna i igenen ang na
kala serei a igenen to.

8 Aino le, lAVE katala sukal a
mangsikei a matang e Eden, si
palpal ipo sanglak ta makarap.
Na eiang vanang kala asinong a
igenen i kana la pitopito ang. 9 E
nei matang ang lAVE kala asereai
ani mamain ta ei anglok pulakai
aongos. Na kipo keve ei talupus
roron luai angkokoai si angan. E
nei liuan i matang ang kala
asereai ani pongua na ei. Ei i to
na ei i malangas ani rikek na
roron. lo Katapo atogon a mang-
sikei a sung katapo saling le Eden
na katapo alis laman ani matang
ang. Si mang palpal i Eden, sung
ang kanlapo tapagal ane si puat
a ngakan i laman. 11-12 Ainoai i
sung, kana asan ta Pison. Laman

2:12

ke kapo saling pulakai nei palpal
AvUa aongos. Na palpal rina ang
kapo duk ta gol roron luai. Eiang
kapa kapo atogon ml sain ro na
iat roron lik ke onikis. i3Vapo-
ngua i sung, kana asan ta Gion,
na kapo saling pulakai nei palpal
Kus aongos. 14 Na vapotol i sung
kana asan ta Tigiris na kapo
saling e ngising i palpal Asur, si
palpal ipo sanglak ta makarap.
Au na vapuat i sung kana asan ta
Euperetes. is LAVE kata asinong
a igenen ang e nei matang e Eden
ani ka itoitonai ania na ka
aiveven ia. 16 Na kala pini ia
asukang ke, "Kupo kalakala luai
si angan si uai i keve ei aongos i
nei matang ke, 17 sikei napo
tubat ua ta ku ago ta angan si ei
i malangas ani roron na rikek
suke. Napo tubat luai anim, using
man ku angan singina, matmat
ka kinkos ua."

18 Na God lAVE kala antok ta,
"Pua, parik kapa ro ani tauan ke
ka ago papalik. Kapo ro ani naka
asinong ta mang anu val nia ani
ka papakangai ania. 19 Aino le,
lAVE kata pitopito na mamain ta
manmanik na ri mani ta roe. Na
kala songo iria ane si igenen ang
ani kame poso asan aniria. lAVE
katapo ago na kapo longong ta
saka asan an a tauan ke ka atuk
a siksikei i keve manmanik na
mani ang tatana. Nang nia kata
lapo kana asan luai. 20 Asukang
vanang a tauan ke kata atuk a ri
manmanik aongos ipo aiveven na
i nei uten na ri mani aongos i nei
pangau na kuli roe ta kari keve

asan. Sikei katapo kovek i sikei
ka ago kuvul ve nia asukang val
kana papakangai. 21 Asukang na
lAVE kala arodot ia ani ka rot
mat. Taun kalapo rot, lAVE kala
luk suai ani sikei a vuk tuan i
vagvag ina na kala pakut pok a
makas ang ta sin. 22 Au na ka luk
a tuan ang na kala pitopito
asereai ani aina tatana. Kala
songo le na aina ang na kanla
atatung ia si kana tauan. 23 si
vuk taun ang kala arai ani kana
aina na kala antok ta, "Pua, kana
vang a mangsikei ig akorong!
Tuan ina, le si tuan ig. Sin i
pukunina, le si sin i pukunig. lo,
naka atuk vang kana asan ta
aina, using kata serei le si tauan."
24 Tukulai ina na tauan ka
papelek a tamana ve rinana na
kan ago kuvul ve kana aina na
kOong sikei palau. 25 si taun ang
a ngono angkisnganan ke
kilongtapo pukun varas na parik
katapa atogon oring si vil
amamaila anirilong singina.

Longogel

3 Nei liuan i keve manmanik
aongos i nei uten ang lAVE
katala asinong iria, kene katapo
nas alava luai aniria. Mangsikei a
taun, kene kata tapasuk na
kamela antok a aina ang asukang
ke, "Au si kapo tutuman nang ta
God kata tubat akorong imilong
asi ago ta angan si mamain ta ei
aongos nei matang ke?" 2-3 Aina
ang kala antok ta, "Namem-
longpo kalakala si angan si ri ei
aongos i nei matang ke. Sikei si

3:17

ei ang e nei liuan i nei matang
ke akorong, God kata tubat
imemlong asi ago ta angan an
singina. Kata atatai imemlong ta
man namemlong angan vo sigil si
ei ang, nganlak namemlong mat."
4 Na kene kala antok a aina ang
ta, "Apua! Parik nang milongpa
angkoai si mat. SArai, God kata
mengen asukang nang using kapo
malangas ta man milongla angan
si ei ang, milongla atogon a nas
lava. Milongla serei asukang
palau val nia, God akorong.
Milongla nas vang a ro na rikek."
6 Au, aina ke kala longong na
kala arai ta uai ina i ei ke kapo
ararai aro na kapo roron asi
angan, na man nganing kala
angan singina, kala atogon a
malangas roron luai. Asukang na
kanla ngumut a mang matan uai
ina na kala angan. Kisngana kapa
katapo tung eiang. Au na aina
ang kala alls ia na kala kun
angan kapa. 7 Na kilongla lomlo-
mon tapalas na kilongla arai kinle
ta kilongpo pukun varas. Asu-
kang na kilongla kikit pan i ei na
kilongla susukai ania asi kari-
long kavat anirilong. 8 Au kalapo
livus aliu tenei ngelik na kilongla
longong a God lAVE sipo pasal
aliu e nei matang ang. Na
kilongla sip sian mumun ania nei
liuan i ri ei i nei matang ang.

9 Sikei lAVE kala songo na tauan
ang ta, "Nei numai kana evoi?"

10 Na tauan ang kala antok,
"Nata longong ua sipo pasal
pulakai na nala mumun anim.
Natapo leng nang using nalapo

pukun varas." n "lau? Au si kata
antok ua ta kupo pukun varas?
Sa, kutala angan si ei ang nata
tubat imilong singina?" 12 Na
tauan ang kala antok ta, "Nang a
aina ke kuta atatung ia singig,
ninia vanang kata luk le na mang
matan uai si ei ang na kanla alis
iau, na nala kun angan." 13 Au na
God lAVE kala antok a aina ang
ta, "Ku antok tapai anig. Sa
akorong kupo abis ia asukang
ke?" Na aina kala antok ta, "Nang
a kene ang, kata kun kapau anig
na nala angan." 14 Asukang na
God lAVE kala antok a kene ang
ta, "Le si sa kutala abis ia, kam
vilvil akui ka asukang ke. Numai
papalik, ri vap ki alele na ki mirik
anim, nei liuan i mamain ta
manmanik. Tutapongai le kana
ku palis ta vingam na ku kon
mutep i kuli roe ani keve taun
aongos tung si ku mat. 15 Naka
amatung a neikien nei liuan
imilong ve aina suke na milong
uli angmamaralai angpokpokai
animilong. Keve matan tivum ki
angmamaralai ve keve matan
tivuna i aina suke. Taun kapo
tulbonai anim ka komeng a
patum, na numai ku kalat a pung
i kakina." 16 Au lAVE kala
mengen a aina asukang ke, "Kam
vilvil akui ka asukang ke. Taun
kupo sungsungukan na kalapo
sinong kam taun asi ingus, ku
nasai ani kui lava. Na ku atogon
a vubuk ani kam tauan, na ninia
ka uli sausaupai anim." 17 Na
kala tutalang a tauan na kala
posong ta, "Numai vanang, kutala

3:17

longolongai ani kalingana i kam
aina, na kula kun angan si ei i
kag tubat ang anim, na kuta
longogel iau. Asukang vanang na
kuli roe ke kala rikek tukulai ina
singim. Na ka uli asukang tung si
ku mat. Ka meng ua na kui i abis
si keve taun asi kam sabonai ani
pok singina. 18 Ka duk ta uriuri
na ei ve angus rodotan, na ku sili
pulakai nei uten lava si gule ta
kam pok asi angan. 19 Ku kun
gese alava vang taun a nei roe
asi apolokai ta kam pok akorong.
Ku abis alava tung si kuan mat
na ku papok ane nei roe. Lomon
akit ia ta kuta serei nang le si
roe, na numai nang kupo roe. Au
na using kapo asukang, taun ku
mat kuan papok ane si ring ang
kuta serei le singina." 20 Na tauan
ang kala atuk a kisngana ta Eva.
Using ninia vanang nganlak ka
rinaria i ri vap aongos. 21 Na God
lAVE kala luk a kulit i manmanik
na kala kavat na ri Adam ve Eva
tatana.

22 Na kala antok ta, "Igenen ke
kalapo serei val tara. Kalapo nas
vang a roron ve rikek. Asukang
na ka ago ta angan an si ei i to
ang vei nganing kala to asikei
luai." 23 Asukang na God lAVE
kala asok suai ania le nei matang
ang ani kan abis matang akorong
ania si roe ang nang kata serei
singina. 24 Au kala kirikai suai
ani igenen ang na kala atung a
Kerubim e mete takaman i
Matang i Eden si palpal ipo
sanglak ta makarap. Na kala
atung kapa na mangsikei a

samele lava ipo visvis. Samele
ang katapo ripag na kapo timis
angtaliungai val ureurek i kut na
kapo tavulit angpok asi tubat ani
selen alak ane si ei i to.